Archive for the 'Kabaret' Category

Ofgesot

Thursday, March 12th, 2020

No showtime tonight!

D’Liesung am CNL ass ofgesot.

Oh my Corona!

Tonight showtime: “Glous” am CNL zu Miersch an dat um 19.30 Auer

Thursday, March 12th, 2020

No der gelongener Avant-Première die leschte Sonndeg zu Woltz, dann elo déi “richteg” Première:

CNL Miersch, 19.30 Auer

Do musst der sinn! Léiwer de Glous-Virus wéi de Corona-Virus, léiwer gutt laachen wéi driipsen a jéimeren.

Glous … d’Liesung

Tuesday, March 3rd, 2020

Elo wou d’Buch drop an drunn ass fir erauszekommen, ginn ech och mat der Liesung op Tournée:
Glous - Eng politesch total onkorrekt literaresch-kabarettistesch Liesung vun a mam Roland Meyer
Déi éischt Datume sti fest:
den 8.3. um 18.00 Auer zu Woltz am Prabbeli
den 12.3. um 19.30 Auer zu Miersch am CNL
de 24.3. um 19.30 zu Ettelbréck an der Bibliothéik … dono geet d’Tournée weider…
“Fréier war alles besser”, gëtt ëmmer nees gesot, dobäi war villes gutt wat hätt kënne besser sinn a villes war schlecht, well mir et net besser woussten. Et war eben anescht!
“Glous” ass eng kabarettistesch Liesung aus enger Zäit ouni Handy a Computer, ouni  Kreditkaart a Greta, dofir iewer mat Fräiheet a Gréisst. Mir si mëttes ouni Opsiicht an de Bësch gaangen an owes hu mir op der Strooss Football gespillt. A mir hunn et iwwerlieft. An der Schoul goufen et Punkten a Pouten a jiddereen huet gefëmmt.
De Roland Meyer mécht sech mat vill hannerhältegem Humouer an onerwaartem Sproochwitz op d’Sich no enger verluerener Zäit, woubäi hien net ëmmer sécher ass, ob en net just nach ee poléiert Spigelbild dovun erbléckst an ob en se och wierklech erëmfanne wëllt.
An trotzdem gloust et nach an eis bannenan, an eis all.

An der Liesung gëtt et Extraiten aus dem Buch, et geet iewer doriwwer eraus, also an der Liesung si Passagen, déi et am Buch net gëtt, oder anescht ausgedréckt, d’Buch geet iwwer de’Liesung eraus, d’Buch geet vill méi wäit a méi an d’Déift. Hmmm???? Wann ëmmer alles esou einfach ze erkläre wär. Op alle Fall sollt Dir weder d’Buch nach d’Liesung verpassen!

Glous … d’Buch

Tuesday, March 3rd, 2020

Nach zwee Deeg, da soll dien neien Erzielband do sinn. Et huet dës Kéier villes onmoosseg laang gedauert, well ech nei Weeër goe wollt, dunn iewer gesinn hunn, datt dat net ëmmer esou einfach ass, nees zréckgaange sinn, nei probéiert hunn, an elo ass esou wäit.

Ech hoffen, Glous gefällt iech!

Et sinn d’70er Joeren an engem Duerf am Zentrum vum Land. Jiddereen huet seng Plaz, déi schonn ëmmer am Duerf gewunnt hunn, bestëmme wat richteg a wat falsch ass, déi aner, déi nei, déi friem mussen sech upassen oder se hunn et schwéier. Esou war et nach ëmmer an esou soll et och ëmmer bleiwen.

Mee elo op eemol mierken d’Protagonisten, datt eppes an d’Rutsche kënnt, datt grouss Ännerungen op déi kleng Leit duerkommen, an datt et ni méi esou wäert sinn, wéi et eemol war.

De Pascal ass esou ee Friemen, hien ass do ënnen aus dem Heim an en ass ganz anescht wéi mir. Hien akzeptéiert d’Regele net, déi zanter éiwegen Zäiten d’Duerf regéieren, seng brutal Direktheet stellt op eemol alles a Fro an d’Hëtzt vum Summer léist d’Gefiller opkachen.

De Roland Meyer hëlt eis a sengem bis elo perséinlechste Buch mat an eng Zäit, déi de Grondsteen geluecht huet, fir déi Welt, an dier mir elo liewen. Villes ass deemools verschwonnen a verluere gaang, mee d’Glous liicht ëmmer nach. Et ass och d’Sich no enger verluerener Zäit, woubäi een net ëmmer sécher ass, ob een net just ee poléiert Spigelbild dovun erbléckst an ob een se och wierklech erëmfanne wëllt.

Glous kënnt wéi gewinnt bei Op der Lay eraus, dem Doris an dem Eric een décke MERCI dofir. Net ze vergiessen ass iewer och de Gollo, dien am Endspurt nach eng ganz wichteg Hëllef war.

The Horse Blinders

Friday, June 21st, 2019

Eng eenzeg grouss Freed!

The Horse Blinders ass een neie Projet zesumme mam Roger Melcher an de Crossroads-Leit Jacques Ruppert a Jake Bock. Zu gudder Lescht ass et endlech gelongen, mäi gudde Kolleg Mulles Scholles mat u Bord ze kréien. Eng staark Equipe!

Mee dat flottst sinn d’Texter. Iwwer d’Fréijoer hunn ech e ganze Koup lëtzebuergesch Texter geschriwwen, wat op dier enger Säit richteg Aarbecht war, op dier anerer iewer och immense Spaass gemaach huet. Dës Texter sinn zum Deel kabarettistesch, dacks gräifen se iewer och d’Mustere vum Blues op, an dat huet mech iwwerrascht: d’Lëtzebuergescht funktionéiert richteg gutt zesumme mam Blues.

Mir haten die leschte Freideg eisen éischte Gig zu Steesel um Blues-Festival an dat war schonns eng fei Saach. Elo sti virum Summer nach zwee weider Concerten um Programm, den 29.6. zu Bartreng an dann um Blues’n Jazz Rallye, an dann huele mir eng Decisioun… geet et am Hierscht weider mat den Horse Blinders?

Mech géif et déck freeën!

Dach, ech liewen ëmmer nach…

Friday, March 29th, 2019

2018 hat e puer onheemlech “gäil” Momenter, mee et wäert fir mech éischter d’Joer vun de groussen Enttäuschunge bleiwen. Ok, dozou wär elo vill ze schreiwen, mee dat maachen ech net op dëser Plaz.

Sechs Méint Loft geholl, oder vläicht och sechs Méint den Otem ugehal, villes iwwer Bord gehäit, zréckgelooss, dat deet wéi, muss iewer sinn.

An da lues, lues a lues nei Pisten, beim Schreiwen ëmmer nees de Gedanken, firwat mechs du dat?,  huet et e Sënn?, Projeten, iwwer déi ech elo schonn immens frou sinn, eng onmoosseg Freed, datt ech se ugaange sinn, nach vill Zweifel, iewer och schonn e bëssen Zouversiicht, no vir kucken, verschaffen, Kraaft opbauen, du kënns net aus dem Näischt.

Heemspill - Food Leaks zu Lëntgen am Veräinshaus

Saturday, October 6th, 2018

De 6.10. um 20.00 Auer ass fir mech ee “Food-Leaks-Heemspill”!

Et ass zu Lëntgen an ech si vu Lëntgen. Zu Lëntgen hunn ech gewunnt bis ech 19 Joer al war, sinn do an d’Primärschoul gaangen, hunn do Football gespillt, hat do meng éischt Frënndin…

Fir kënnen zu Lëntgen ze liesen, ass mir eng onheemlech Freed!

“Tabula Rasa” de Sténkdéier-Programm 2018

Friday, August 10th, 2018

Kabaret ass net méi esou einfach. Soss konnt Kabaret roueg populistesch sinn, jo huet et esou guer misse sinn, well e war fir jidderee geduecht. Haut soll en och fir jidderee sinn, just däerf en net méi populistesch sinn, dien Eck ass vun anere Leit besat.

Also séier Tabula Rasa gemaach a ganz nei ugefaangen! Nei Leit, nei Themen, neie Programm… an ëmmer nach gutt!

Den 8.11. geet et zu Maarnech am Cube 521 lass. Hei kënnt dir buchen.

Vum 14.11. geet et zu Miersch am Kulturhaus weider. Hei gëtt et Ticketen.

An da geet et vum 30.11. un op Biergem/Monnerech an de Nëssert.(Gëtt geschwë fräigeschalt…)

An der Woxx bréngt de Luc Caregari et op de Punkt

Thursday, August 9th, 2018

Hei den Artikel aus der Woxx iwwer “Wenn immer alles so einfach wäre”.

De Luc Caregari bréngt et op de Punkt: “… zu klein die Zuversicht, dass es sich bei diesem luxemburgischen Roman wirklich um eine Entdeckung handeln könnte”, “…man lese den x-ten Versuch eines hiesigen Grundschullehrers, seinen verstaubten Vorbildern nachzuäffen”, “…eher als Kabarett- und Kinderbuchautor bekannt”. …

Wou kommen déi Viruerdeeler hier, nodeem et e “Muedebëtzeg” (Lëtzebuerger Buchpräis) gouf an ee “Roughmix” (Servais-Präis), déi “Wenn immer alles so einfach wäre” an näischt nostinn??? Sollen déi Bicher net gelies gi sinn????? Froen iwwer Froen.

Verkafen ech mech net gutt genuch, hunn ech de Luc gefrot. Du hues keng Starallüren, huet hie geäntwert.
Merci Luc, elo muss ech tiermen….

“Wenn immer alles so einfach wäre” - mam Valerija Berdi op 100,7

Wednesday, August 8th, 2018

Ganz vill Freed, ganz vill Emotiounen a ganz vill Informatiounen!

Zwou Emissiounen um 100,7 vum Valerija Berdi, déi ganz wäit hannert d’Façade kucken.

Eng formidabel Rezensioun vu “Wenn immer alles so einfach wäre”

E spannenden Interview iwwer elauter Saachen, mat dienen ech net gerechent hat.

Villmools merci Valerija!