Mir maache just schéin

September 28th, 2016

De Roger Melcher an ech, vu verschidde Leit elo als “Winklepickers-Duo” bezeechend, spillen e Samschdeg, den 1.10. am Nëssert zu Biergem/Monnerech en Deel vun eisem neie Programm um “Blues-Contest”.

Jiddereen die mech kënnt, wees, datt ech ni ging bei esou engem “Contest” matmaachen, dofir si mir och just d’Pauseclownen… mee dat mecht iewer Freed a fir mech ass et d’Geleeënheet, virum Start vum Kabaret, nach eng Kéier déi eng oder aner Saach ze probéieren.

Well mam Roger ging ech gären dat nächst Joer e ganze Programm Liesung-Kabaret-Blues-etc… maachen.

Sinn emol gespaant!

Schmeier! Et geet nees lass…

September 28th, 2016

Déi nächst Woch fänken d’Prouwen un, d’Texter sinn esou gutt wéi fäerdeg, d’Opreegung klëmmt. Zemools wëll et dëst Joer ganz sauer gëtt: de Raymond “Berti” Bertemes kann net dobei sinn, an et ass guer net drunn ze denken, hie wëllen ze ersetzen. Zanter 1996 si mir also déi éischte Kéier an der Situatioun, ouni hien unzetrieden…

De Gilles Wunsch kompletéiert d’Equipe 2016 mam Irène Zeimes, mam Conny Braquet a mam Nico Dabé.

Et geet also em d’Wurscht, no diene ville Verännerungen vun diene leschte Joeren, déi un d’Substanz an un d’Identitéit vun der Trupp gungen, musse mir elo kucken, ob a wéi et weidergeet:

Am Cube 521 zu Maarnech

10.11.2016 – 20.00 Auer
11.11.2016 – 20.00 Auer
12.11.2016 – 20.00 Auer
13.11.2016 – 18.00 Auer

Am Mierscher Kulturhaus

Am klenge Setting mat ronnen Dëscher:
15.11.2016 – 20.00 Auer
16.11.2016 – 20.00 Auer
17.11.2016 – 20.00 Auer
18.11.2016 – 20.00 Auer
19.11.2016 – 20.00 Auer
20.11.2016 – 17.00 Auer

Am groussen Theatersetting:
23.11.2016 – 20.00 Auer
24.11.2016 – 20.00 Auer
25.11.2016 – 20.00 Auer
26.11.2016 – 20.00 Auer

Am Kulturzenter beim Nëssert zu Biergem / Monnerech

1.12.2016 – 20.00 Auer
2.12.2016 – 20.00 Auer
3.12.2016 – 20.00 Auer

Hei kënnt Dir direkt Ticketë bestellen www.luxembourg-ticket.lu!
Oder rufft um 47 08 95 1 un…
Infoe gëtt et hei: www.stenkdeier.lu

Zikelalarm II - Offiziell Virstellung den 21.10. zu Peppeng

September 19th, 2016

Hei stelle mir dat neit Buch vir:

Musée Rural et Artisanal - Musée des Calèches… PEPPANGE –> 21.10.2016 um 19.30 Auer am Festsall

Am Virwuert schreiwt de Roland Meyer:

„Zikelalarm” ass fir mech mëttlerweil méi wéi een Text, dien ech mat vill Freed virliesen. „Zikelalarm” huet fir mech d’Zil, op eng vill méi lëschteg a geloossen Aart a Weis iwwer d’Schoul, de Schoulsystem, d’Schoulpolitik, d’Schoulpersonal an iwwert mech… nozedenken. Dacks hunn ech den Androck, datt mir all vill zevill iwwer d’Schoul streiden an ze wéineg iwwert si nodenken.
A genee dat bestätegen déi meescht Réckmeldungen, déi ech zum „Zikelalarm” krut. An ech krut a kréien der immens vill! Bei kengem Buch, bei kengem Kabaretsprogramm a bei kengem Theaterstéck hunn ech och nëmmen usazweis esou vill „Feedback” kritt. Dat fannen ech an diem Sënn interessant, well et weist, datt ee ganze Koup Leit een neien, méi of- oder och opgekläerten, méi ironeschen, mei erwuessenen Zougank zum Thema sichen. Jo, sech selwer och emol op den Aarm huelen, iwwer sech selwer laachen an zu sech selwer op Distanz goen, dat deet villen op diem verminnten Terrain vu Bildung an Erzéiung terribel gutt.
Huet den „Zikelalarm I” sech virun allem mat diene „Miriarde Reformen” a Reförmercher beschäftegt, déi méi oder manner naiv, an an der kompletter Ignoranz vu méigleche Konsequenzen, op Orbit gesat goufen, beschäftegt, esou huet den „Zikelalarm II” den Alldag vum Enseignant zum Thema.

Zikelalarm II … release 15.9

September 12th, 2016

Boaw, wat waren dat zwee Joer!

Well ech esou villes, wat am Enseignement geschitt war, net méi richteg verstanen hat, deemools, virun dräi Joer, an ech mengen, dat mierkt ee ganz gutt, wann een am “Zikelalarm I” liest, sinn ech nees zréck an d’Schoul gaangen: do soll ee jo eppes léieren, am Fong, an da soll een d’Welt besser verstoen, gëtt gesot. Also am Idealfall soll dat esou sinn, esou stelle mir eis dat vir an esou hätte mir et gär, an esou wir et och ganz praktesch, och wann et an der Wierklechket seelen esou ass. Konjunktiv an Indikativ eben… déi koumen nach ni op ee gringen Zwäig.

Ech hat mech deemools, virun dräi Joer, fir ee Masterstudium op Distanz, dat sech “Schoulmanagement” nennt, zu Kaiserslautern ageschriwwen. An ech hunn och bis zum Schluss duerchgehalen, och wa vill Saachen, dei ech do geléiert hunn, mir schwéier um Mo leien. Mee duerch Reiwung entsteet Hëtzt, an d’Hëtzt ass eng Form vun Energie an esou sinn ech net onzefridden, datt ech dat Studium gemaach hunn. Allerdings huet dat Ganzt dach een navell batteren Nogeschmaach: ech hunn all déi Zäit näischt geschriwwen. Nee, dat ass falsch, ech hunn déi Zäit keng Bicher geschriwwen. Ech hunn net u Bicher geduecht, ech hu keng Iddie gesammelt an ech hunn net u Bicher geschafft, ech hat einfach keng Zäit dofir.

Wei esou dacks a mengem Liewen, grad wann eppes gutt ufänkt ze dréinen, da maachen ech eppes Anescht. An et war gutt gelaf, virun dienen dräi Joer: “Muedebëtzeg” hat 2012 de Lëtzebuerger Buchpräis kritt, “Roughmix” 2015 de Servais-Präis an “Zikelalarm I” war ee richtege Lëtzebuerger Bestseller. An dunn,… jo du koum näischt méi, ausser Klausur, Wëssenschaft, Häusaarbecht, Masteraarbecht, Bologna… een anert Liewen.

Elo mellen ech mech zréck, mat “Zikelalarm II”.

Esou Momenter

July 5th, 2016

Et gëtt esou Momenter, do gings de am léifsten d’Béngele bei d’Tromm geheien…

Ech hunn elo just esou ee Moment “duerchlieft”: Mam Zikelalarm II - Text war ech elo ee Joer op Tournée. Den Text huet gelieft, huet sech weiderentwéckelt, ass gewues an nees zréckgeschnidde ginn, ass geännert an nach eng Kéier geännert an ugepasst ginn. Je alles wat een Text an engem Joer muss erleiden huet en erlidden. (Ass e besser ginn?)

Elo soll en dann als Zikelalarm II a Buchform erauskommen. Da verännert en sech net méi, da gëtt en a Stee gehummert, an Eise gegoss… FREEZE!

A wéi ech no laangem Iwwerschaffen, Verbesseren, Ergänzen a wat weess ech nach net allem, den Text endlech esou wäit fäerdeg hat, datt ech en dem Remy Kraus an d’Lektorat schécke wollt, du war en op eemol verschwonnen… an den onergrëndlechen Déifte vun der Festplak war e verluer gaangen, an och ganz vill sichen huet en net méi zréckbruecht, un d’Uewerfläch, op den Ecran.

Mir ass just eng Printversioun bliwwen, déi ech, wéi duerch e Wonner, an opgrond vun enger onerkläerlecher Intuitioun gemaach hat.

An déi Printversioun ass elo d’Virlag fir de Verlag ginn… nach ëmmer froen ech mech, wat do eigentlech geschitt war.

The Winklepickers… kënne mir et nach?

July 4th, 2016

Den 20.7. 2016 um 20.00 Auer am Little Wookstock zu Iernzen testen de Roger Melcher an ech, ob mir et nach kënnen, no dier laanger Paus vun dräi Joer.

An déi Paus war och néideg! Nodeems de Paul Lebrun eis fir ëmmer verlooss hat an ech mech fir ee Studium zu Kaiserslautern ageschriwwen, konnt et net einfach esou weider goen. A wa mir elo just zu zwee sinn, dann ass dat an éischter Linn aus Respekt fir de Paul. Him seng Plaz wollte mir net einfach esou mir näischt dir näischt nei besetzen. Wann iwwerhaapt, da maache mir dat an der zweeter Etappe. An dat hängt elo vun Ärem Uerdeel of!
Haart Musik fir haart Zäiten ass also nees de Motto: Zwou Stëmmen, eng Dosen Harpen, eng akustesch Gittar, de volle Programm mee keen Akkord zevill.

Et ass wéi beim Motor vun engem Auto: d’Astellung muss stëmmen, da kanns de Gas ginn.

See you at Little Wookstock… mir hunn d’Ënnerstëtzung batter néideg.

30 %

May 6th, 2016

Ech war de Moie beim Metzler. Ech wollt Grillfleesch kafen. Eng Fra wollt dat och. Mee si huet sech opgereegt. D’Fleesch wir esou deier, geschwë kënnt kee Mënsch sech nach eng Kotlett oder e Stéck Speck leeschten.
Jo, et gëtt wierklech alt méi deier, hunn ech geduecht.
De Metzler ass kuerz an der Wurschtkiche verschwonnen. E koum mat engem plastiks Behälter zréck. En huet der Fra a mir en ëmmer d’Nues geriwwen. Kreider, duecht ech. Eng Kräidermëschung, sot de Metzler. Schonn drësseg Joer maachen ech se selwer.
Wat wollt hien?
Dat lescht Joer sinn d’Gewüerzer 30 % méi deier ginn, sot hien. En huet gelaacht. A wa mir wëllen, datt déi Leit an hiere Länner bleiwen, da musse mir déi 30 % bezuelen. Ouni eis opzereegen.
Méi ass et net, duecht ech.

Liesungen am Fréijoer: “Zikelalarm II”, “Roughmix” a “Muedebëtzeg”

March 17th, 2016

Hei den “Update” vun de Liesungen fir Erwuessener:

12.4.: Roughmix a Muedebëtzeg zu Betebuerg

15.4.: Roughmix a Muedebëtzeg zu Ingeldorf

21.4.: Zikelalarm II zu Ohn op der Musel

23.4.: Speeddate an der Belle-Etoile

D’Schoulliesungen sinn net hei dobei.

Am Hierscht ass da scho geplangt:

21.10.: Zikelalarm II zu Peppeng

12.12.: Zikelalarm II zu Déifferdeng

Tonight showtime: 10 Joer Musel-Sauer Médiathéik

March 12th, 2016

Den Owend um 19.00 Auer zu Wasserbëlleg am Centre Culturel zesumme mam Roland Harsch a mam Jhemp Hoscheid.

Infoe gëtt et hei.

Tonight showtime: Muedebëtzeg a Roughmix zu Mamer

March 8th, 2016

Den Owend um 19.30 Auer zu Mamer am Kinneksbond: eng Liesung aus Roughmix a Muedebëtzeg:

“Roland Meyer, Jahrgang 1963, Lehrer von Beruf, Leiter der „Theaterschoul“ seit 2008, ist Musiker sowie vielseitiger und erfolgreicher Autor. Vorläufige Krönung seiner Schreibkunst ist der „Prix Servais 2015“ für seinen Roman „Roughmix“, dies nachdem er 2012 für sein Werk „Muedebëtzeg“ den begehrten „Lëtzebuerger Buchpräis“ in der Kategorie „Literatur“ erhalten hat. Bekannt ist Roland Meyer nicht nur für seine packende Erzählweise und seine feinfühlige aber direkte Sprache, sondern auch für seine recht spitze Feder. „Zikelalarm I II“ sind Sammlungen kabarettistischer Texte, in denen aktuelle Themen um das Erziehungswesen und einen „Tag im Leben eines Lehrers“ (er ist selber Lehrer von Beruf) im Mittelpunkt stehen.

Roughmix (Editions Op der Lay, 2015) zeichnet das aktuelle Bild eines Ministers und eines Grundschullehrers, die in den 80er Jahren gemeinsam in einer „Rockgruppe“ gespielt haben. Es ist das Portrait einer Generation, die im Rückblick manches verbindet und einiges trennt.

Muedebëtzeg (Editions Op der Lay, 2012) greift das Thema „Krebskrankheit“ und ihre Folgen auf, beleuchtet dies aus mehreren Blickwinkeln. Der Brustkrebs steht hier auch als Synonym für den menschlichen Verfall individuell-persönlich und für den Zustand der in sich zerbröckelnden Gesellschaft.”

Hei gëtt et Informatiounen.