Roland-Meyer.lu

A weider geet et mat der kabarettistescher Liesung iwwer d’Erzéiung zu Lëtzebuerg… dës Kéier zu Esch!
Dir wësst jo, hei gëtt et d’Buch zum éischten Deel.

An hei en Extrait aus diem Buch:

“Lifelong learning: Dir wësst jo all, wéi dat geet! Et kënnt een dohinner, 20 Persoune sëtze genéiert an engem grousse Krees a mussen sech der Rei no virstellen. Do héiert een dann 20 Mol dieselwechte Saz, dien dien Éischtgefrote sech zesummegebastelt hat, an um Enn hues du all d’Nimm nees vergiess.
Dann eng kuerz Introduktioun vum deier bezuelten ausläneschen Expert an dono…: Aarbechtsgruppen. Ouni Aarbechtsgruppe leeft beim Life-long Learning guer näischt. Déi, déi sech kennen, stellen sech de Batti, fir beieneen ze kommen. Déi aner kucken, fir een ze fannen, dien no äifregem Schaffen ausgesäit; die kann dann déi ganz Aarbecht maachen.

No 3 Stonnen daucht den Expär dann nees op an da kënnt dat Bescht: All Aarbechtsgrupp stellt seng Aarbecht vir: Do kriss de eppes ze laachen, do schwätzen da ganz normal Leit op eemol, wéi wa se vun alle gudde Geeschter verlooss wieren. Dien auslänneschen Expär, dien elo mécht, wéi wann en alles géing verstoen, fënnt dat dann och nach gutt. Do amëséieren ech mech ëmmer am beschten – bis ech selwer dru kommen…

A wann s de da ganz vill Pech hues, a wann nach Zäit bleift, da kënnt elo mat absoluter Sécherheet nach e Rollespill. Ech hu bis haut nach net verstanen, firwat esou ee Rollespill gutt soll sinn. Op alle Fall behëlt sech do jiddereen esou, wéi en sech ni am normale Liewe behuele géif. Definitiv net! Ech erwëschen ëmmer d’Haaptroll, well déi Clever sech déi kleng Rollen direkt ënner den Nol gerappt haten. An da kann ech mech, zum Amusement vum ganze Sall, fir déi nächst zéng Minutten zum Klon maachen.
Well den Expert die leschten Zuch nach muss kréien, bleift keng Zäit méi, fir d’Rollespill ze diskutéieren an auszewäerten, a mir ginn alleguer mat engem Zertifikat an der Hand entlooss.

Wann ech da kuerz drop mäi Computer doheem umaachen, wat fannen ech do: Een Evaluatiounsziedel, op diem ech op 200.000 verschidde Manéiere muss ukräizen, wéi gutt dien Expär alles gemaach huet a wat die Cours mir alles bruecht huet.”

Den Text ass fäerdeg, et ka lassgoen!

An der Päischtvakanz all moies geschriwwen a gelies an elo spiren ech, wéi ech lues a lues ëmmer méi nervös ginn. Et ass elo die Moment, dien et virun all Première gëtt: et wees een net ob et eppes ass, et wees en net, ob et bei de Leit ukënnt, ob et fonktionnéiert. Ëmmer emol nees mengt een, et wir iwwerhaapt näischt an et misst ee vu ganz vir ufänken… eng zimlech stresseg Situatioun, déi wahrscheinlech näischt anescht wéi “Lampenfieber” ass.

D’Buch vum Zikelalarm 2013 ass fäerdeg ginn, an dat gëtt et elo iwwerall ze kafen.

Zikelalarm 2013 als Buch bei Op der Lay

Diem hunn ech näischt bäizesetzen …

Dach, merci Armand fir d’Foto a Jang fir de Brëll!
Liest hei den Artikel.

Wat fir eng Woch!

Merci iech all, déi dir mir esou léif a vill gratuléiert hutt. Ech hu mech immens gefreet!

Merci dem Jury, fir déi wierklech cool Entscheedung!

Merci dem Verlag Op der Lay, ëmmer op menger Säit, ëmmer bereet, eng Hand mat unzepaken, an esou richteg léif Leit.

“Roughmix” kann een hei bestellen.

“Roughmix” op RTL

La Fondation Servais vient de décerner le Prix Servais 2015 à Roland Meyer pour le roman Roughmix paru en langue luxembourgeoise aux éditions Op der Lay à Esch-sur-Sûre. Le Prix Servais récompense depuis 1992 l’ouvrage littéraire le plus significatif paru au cours de l’année précédente. Il est décerné annuellement, sur proposition d’un jury indépendant. Le Prix Servais est doté de 6.000 euros.

“Roughmix vum Roland Meyer ass en aktuellen, spannenden an amusante Roman, deem seng ongenéiert Tonalitéit a bewosst fragmentéiert Form de Lieser iwwerraschen. Ouni Kompromësser blécke verschidden, an hirer schifer Individualitéit plastesch erausgeschafften Erzieler zréck op hiert Liewen zu Lëtzebuerg an op hir Dreem vun enger Flucht an aner Länner, déi sech awer all als stereotyp an illusionär Aussteiger -Destinatiounen erausstellen. Mat enger gepefferter Ironie a voller Uspillunge kritiséiert den Text all Moudephänomener an all Forme vun Ideologie, siefe se politesch, moralesch oder literaresch. D’Romanform beandrockt duerch e gelongene Wiessel vun den Erzielperspektiven, eng ënner anerem vun der Rockmusek inspiréiert Kompositioun an duerch e Schreiwen, an deem verschidde Stiler (Roman, Tagebuch, Journalismus) matenee verbonne ginn. Wéinst dëser ganz eegener schrëfstellerescher Leeschtung, wéinst dem schaarfen, kaleidoskopaartege Bléck op d’Gesellschaft, awer och fir op e wichtege Moment vu Reflexioun iwwer d’Sprooch an d’literaresch Kreatioun hinzeweisen, zeechent de Jury dëst Wierk vum Roland Meyer aus. Roughmix ass a Lëtzebuerger Sprooch geschriwwen an ass am Verlag Op der Lay zu Esch-Sauer erauskomm.”

La date précise de la cérémonie de remise solennelle au Centre national de littérature sera communiquée ultérieurement.

Le jury du Prix Servais 2015 était composé de Jeanne E. Glesener, Odile Linden, Claude Mangen, Pierre Marson (président), Jeanne Offermann, Alex Reuter, Annette Schlechter, Sébastian Thiltges et Isabelle Weis.

www.autorenlexikon.lu/page/author/364/3646/DEU/index.html

www.autorenlexikon.lu/page/author/364/3646/FRE/index.html

Les lauréats du Prix de la Fondation Servais:

Och dëst Joer mat diem engen oder aneren Text dobei. Hei de Pressetext vun der Equipe vun der Revue 2015:

“Let’s get ready to Ramba! Nom Motto „Neit Féiwer“ ziort ass dëst Joër richtegen „Ramba T’Samba“ ugesot. D’Revue 2015 steet dann och, op t’mannst wat dat Musikalescht ubelaangt, ganz am Zeechen vu flotten Samba-Rythmen.

D’Auteuren vun der Revue 2015 Romey (Roland Meyer), Wagu (Guy Wagner), Jochri (Jos Christen), Marquis (Marc Weidert), Muje (Jean-Claude Muller), Patkay (Patrick Kayser) an ZoGa (Zoltan Gaetti), zesummen mat de „Revue All Star Band“ Leaderen Heng Kleren a Robi Arend  a mat de Choréographen Cathy Moes a Li Marteling hun Iech och dëst Joër erëm een flotten Cocktail vu Sketcher, Lidder an Danz zesummegemixt, bei deem keen A vu Laachen drëche bleift.

D’Régie lait wéi gewinnt an den Hänn vum Zoltan Gaetti.

Wat ass lass mat eiser neier Gambia-Regierung? Wat geschitt dann elo mat eisem Land? Dëst sin nëmmen 2 vun de Froën, ob déi dir bei där neier Editioun vun der Revue vum „Lëtzebuerger Theater“ ganz bestëmmt eng Äntwert wärt kréien. An esou munech Politiker léisst sech et net huelen, ob ee Patt beim Dilli a beim Rolli eran ze sprangen wann d‘Hochzäit am Zerkel bevirsteet. Schlëmmer geet ëmmer, därs si sech eise Premier mat eisem Vizepremier an eisem Äerzi no deenen dach ziemlech brüsk gefouerten Gespréicher iwwert d‘Trennung vu Kierch a Staat séier bewosst, och wann eisen Haff sech muss mam „Crépuscule“ beschäftegen? Nee, nee, keng Angscht, d‘Monarchie geet nach net ënner. A wann d’Astrid an déi 2 bekannteste Jacques’en aus eiser Politik no engem Begriefnis beim Patt iwwert déi fréier, dach vill besser Zaiten an der lëtzebuerger Politik philosofféieren a klaatschen an traatschen, da frees de dech duerno och bestëmmt: Firwat reegs de dech dann op? A spéitstens bei enger neier Editioun vum Ronndëschgespréich ass de Ramba T’Samba ënnert eise léiwe Politiker komplett, soudass souguer de Juncker no der Luxleaks-Affär zu Bréissel ëm Rot beim Manneken Pis freet…

Première ass den 3. Abrëll am Groussen Theater an der Stad. Weider Virstellungen sin nach vum 4. bis den 19. Abrëll am Groussen Theater, ausser Ouschtersondeg, an ausser dem 13. a 14. Abrëll.

Gespillt gëtt nieft dem Groussen Theater an der Stad wéi all Joër am CAPE zu Ettelbréck vum 22. bis de 26. Abrëll, am Aale Stadhaus zu Déifferdéng vum 13. bis de 16. Mee, an am Escher Theater vum 18. bis den 22. Mee.

Dir gesidd op der Bühn d‘Equipe vum „Lëtzebuerger Theater“ mam Martine Haubrich, Dana Zangerlé, Tania Schaeffer, Stéphanie Welbes, Will Aust, Marc Camy, Ricardo Vieira, Raoul Albonetti a Jean-Claude Muller, a mat der Partizipatioun vu Sambrasil

Regie: Zoltan Gaetti

Musik: Heng Kleren a Robi Arend

Scenographie: Sophie Maurer

Inspizienz: Josée Conrardy

Choreographie: Li Marteling a Cathy Moes

Beliichtung : Mike Felten

Stage-Crew : Marc Bohnert a Gilles Konsbrück

Video: Melting Pol

Kostümer: Carine Ceglarski

Coiffure a Maquillage: Coiffure et Beauté By Tun”

Hei gëtt et weider Informatiounen…

“No dem Zikelalarm 2013, dien de Roland Meyer mat immens groussem Erfolleg uechtert d’Land opgefouert huet, leet den Auteur, Musiker, Kabarettist a … Schoulmeeschter elo no: den Zickelalarm II hëlt déi pädagogesch Situatioun am Ländchen op de Leescht a liicht bis déif an déi däischterst schwaarz Lächer an de Klassesäll, de Maison relaisen an de Ministären: ee ganzt Land weess net méi, wéi et soll seng Kanner erzéien an dobei kann de Roland Meyer net roueg nokucken. Hien zéckt net fir de Fanger ze weisen an de Mond opzedoen.”

Schéinen Text, mat diem den Zikelalarm II ugekënnegt gëtt!

Hei sinn déi éischt Datumer:

2.6.: zu Biergem am Kulturzenter “Beim Nëssert” –> Hei gëtt et Informatiounen

9.6.: Zu Esch am Casablanca

PS: Den Text vum Zikelalarm I gëtt et geschwënn a Buchform…

Schwiereg Zäite brauchen extra Weeër fir derduerch ze kommen.

Lues a lues gesinn ech op en Enn.

Als nächst geet et weider mam Zikelalarm II a mat enger Rei Schoulliesungen.

Bicher sinn am Moment keng geplangt, wëll ech de Kapp net dofir hunn, mee den Text vum Zikelalarm I gëtt elo geschwë publizéiert.

Ech denken och ëmmer nees méi kräfteg iwwer Musik-maachen no, och wann de Paul eis verlooss huet, an dat alles net esou kloer ass. Hie feelt vir an hannen a bei all Projet, iwwer dien een nodenkt, kënnt ee fréier oder spéider op de Punkt, wou de Paul virun engem opdaucht… an iewer!

Nach e bësse Gedold, eng oder zwou Wochen, da weess ech méi!

E bëssen e mulmegt Gefill hunn ech schonn: den Owend ass déi lescht Virstellung vum 2014er Sténkdéier Programm… “méi ass et net”, soe mir no der Dernière, “et war e gudde Joergang a mir freeën eis schonn op dien nächsten.” An iewer feelt et engem! Hei die ganzen Text vum “Klenge Keller”, fir matzesangen, den Owend oder ni:
1. ‘t war Owend zu Miersch - an et gouf séier däischter - de Niwwel loch fest op all Haus
Mat Mantel a Schaal - d’Wanterschung nees dobaussen - man d’Leit sech aus der Keelt eraus
Den Daag ass eriwwer - mee d’Virfreed nach laang net - ee Joer hat Dir drop gewaart
Dir stiermt d’Trapen ‘rof - an die mëffege Keller - wou d’Sténkdéieren Iech schonns erwaart

A weider mam Jabel! Déi lescht 4 Virstellungen sin am klenge Kader am Mierscher Kulturhaus, mat maximal 150 Leit. Mir probéieren esou, d’Atmosphär vum Keller aus dem Literaturhaus nees - e bëssen - opliewen ze loossen…
“Die klenge Keller am Literaturhaus
Do wou de Kabaret nach Klengkonscht war
Die klenge Keller zu Miersch an dem Servaishaus
Wou mir vu Laachen an d’Box bal gemaach
Die klenge Keller am Literaturhaus
Do wou de Kabaret nach Klengkonscht war
Die klenge Keller zu Miersch an dem Servaishaus
Do ware mir - all zesummen - esou gär”

www.stenkdeier.lu