Roland-Meyer.lu

Haut ass definitiv kee gudden Daag. De Moien ass de Paul gestuerwen, no laanger Kankheet. Bei de Winklepickers hu mir joerelaang zesummegespillt, hien um Bass an ech op der Gitar.

Zwou CDen hu mir zesumme gemaach an eigentlech sollten d’Winklepickers just e bësse pausen, wëll ech mam Studium am gaange sinn. Mee aus dier klenger Paus ass eng eng méi laang ginn, wëll de Paul op eemol krank ginn ass, an elo ass en dout. Hie feelt elo schonns, an ech wees net wéi et iech geet, mee ech ka mir d’Winklepickers ouni de Paul net virstellen.

Dem Maggy an der ganzer Famill mäin häerzlecht Bäileed.

Ech wäert de Paul ni vergiessen, dir bestëmmt och net!

Hei e Video, an diem dir de Paul bei senger Lieblingsbeschäftegung gesidd: am Studio mat de Kollegen ophuelen.

Och fir eis ass dëst eng total Première! Nodeems mir net méi kënnen am Keller vum Nationale Literaturzenter spillen, hate mir decidéiert, nieft Miersch och eng Kéier an d’Éisleck an eng Kéier an de Minette ze goen. No diem grousse Succès die leschte Weekend zu Maarnech am Cube 521 - villmools merci iech all - ass d’Rei elo um Kulturzenter “beim Nëssert” zu Biergem. Mir si richteg gespaant, wéi mir am Minett empfaang ginn a freeën eis op déi 3 Virstellungen.

Tickets an Informatiounen gëtt et hei

Dat ass et nach ni ginn! De “Kabaret Sténkdéier” geet op Biergem. Duerch déi Changementer am Literaturhaus ware mir gezwongen ze reagéieren, an elo si mir gespaant, wéi mir am Minett empfaange ginn. Mir freeën eis!

Hei gëtt et Infoen

De Claude “Sibi” Sibenaler huet och dëst Joer nieft all de Fotoen och nees den Trailer fir die neie Programm vum Kabaret Sténkdéier gemaach. Et kann een en elo op Youtube kucken. Vill Spaass!

Hei ass den Trailer vun “Drôle de guerre”.

An engem ganz flotten Interview mam Angie Maquil um 100,7 hu mir iwwer die neie Programm “Drôle de guerre” vum “Kabaret Sténkdéier” geschwat, wéi een sech esou virun enger Première fillt, wéi et ass, wann de Grupp ëmmer nees wiesselt a wat de “Lëtzebuerger Buchpräis” fir mech bedeit…

Hei kënnt dir den Interview um 100,7 lauschteren.

Première vun “Drôle de guerre”, dem Programm 2014 vum “Kabaret Sténkdéier”, haut den Owend um 20.00 Auer am Cube 521 zu Maarnech. Weider Virstellungen e Samschdeg an e Sonndeg, déi iewer all ausverkaf sinn… mee mir spille jo nach zu Biergem an zu Monnerech.

Hei kënnt dir den Interview lauschteren:

rtl.lu

an hei gëtt et weider Infoen:

stenkdeier.lu

Et gëtt esou lues Eescht! Nach zwou Prouwen zu Pëtten bei Miersch, an da plënnere mir fir d’Generalprouwen op Maarnech an de Cube. De Carlo Muller, zesumme mat senger Equipe, huet d’Bühn elo esou gutt ewéi fäerdeg an et fänkt u spannend ze ginn.

Mir sinn am Tunnel, kënne net méi soen, ob mir “Drôle de guerre”, de Programm 2014, solle gutt fannen, dofir hu mir elo ze laang geprouft, an d’Iwwersiicht verluer… an all freeë mir eis op freides, de 7.11., den Dag vun der Première.

www.stenkdeier.lu

Am DCK2/2014 huet de Gilles Wunsch en Artikel iwwer mech publizéiert, dien der Wouerecht ganz no kënnt: vill Biografie, vill Literatur, vill Musik, vill Theater a Kabaret. An dann dem Gilles säi ganz besonnesche Stil, ëmmer dann, wann hien iwwer d’Éisleck schreift.

Hei kënnt dir den Artikel “Konstemer Blues” liesen.

Um 20.00 Auer ass déi zweetlescht Statioun vun eisem Roughmix-Tour. Wéi ëmmer mat dobäi “Just Friends”, de Mulles Scholtes, de Luc Hoffmann an de Jang Steffen.

Weider Informatioune gëtt et hei.

Wann dir fir Roughmix wëllt voten, da geet dat hei.