Wéi sot de Verlag “Op der Lay” haut esou schéin: et ass dat aller-alleréischt lëtzebuergescht Buch, dat ee bei Amazon kann op säi Kindle eroflueden.
Sinn e bëssen houfreg… 
Et ass nees d’Zäit vun de “Walfer Bicherdeeg”. Leider kann ech dëst Joer kee Präis gewannen, ech hu keen neit Buch um Start. D’lescht Joer war dat eng flott Saach mat “Muedebëtzeg”… “Lëtzebuerger Buchpräis” an der Kategorie Literatur!
An der 2013er Ausgab vun der Walfer Anthologie ass iewer elo en Text vu mir drann, dien die schéinen Titel “Obszön” dréit. Alleng dat ass dach e Grond, sech d’Buch ze beschafen. A wéi ëmmer weist et kloer an eng Direktioun: nämlech an déi vum nächste Buch.
Nieft mengem Text gëtt et och nach Texter vum Serge Basso de March, Raoul Biltgen, Pierre Decock, Ian de Toffoli, Alexandra Fixmer, Roland Harsch, Lex Jacoby, Dennis Kirps, Rafael David Kohn, Henri Losch, Carla Lucarelli, Nathalie Ronvaux, Stéphane Ghislain Roussel, Elise Schmit, Valérie Schreiner a Luc Spada. D’Fotoe si vum Christian Aschman.
Hei ass déi lescht Chance fir dem “Kabaret Sténkdéier” säi Programm “Héichwaasser” iewer nach ze gesinn:
Sonndes, den 1. Dezember um 17.00 Auer gëtt et nach e puer Plazen. Dono ass et zou! Mir kënnen och net verlängeren, well dat aus organisatoresche Grënn net méiglech ass. Maacht Iech also séier bäi; dien éischten ass vir!
Déi nächst Statioun vu menger kabarettistescher Liesung “Zickelalarm” ass an der Staadt am Cercle Cité. Um 18.30 Auer geet et lass: 2, rue Genistre / Place d’Armes.
An diene nächste Woche stinn zwou Liesungen a Schoulen um Programm:
E Freideg, den 8.11. liesen ech am Sportslycée um Cents aus dem “Décken dommen Dudu”.
E Freideg, de 15.11. liesen ech am Kader vun de Walfer Bicherdeeg zu Helmseng an der Grondschoul aus “Zu Lëtzebuerg ginn et keng Piratekapitänen”.
De Claude “Sibi” Sibenaler huet den Trailer 2013 zum Programm “Héichwaasser” elo fäerdeg.
De 24.10. geet et um 20.00 Auer zu Woltz am Prabbeli; 8, rue de la montagne, weider mat dem “Zickelalarm”.
“An enger kabarettistescher Liesung an den Zentrum vu Kannerbetreiung, Hausaufgabenhëllef, Burnout an Erzéiungsfrust hëlt de Roland Meyer kompromis-, respekt- a matleedslos dien aktuelle Stand hei zu Lëtzebuerg op de Leescht.”
Entrée: 12 € / 5 €
Et ass ëmmer esou, elo maache mir et scho 25 Joer laang, an all Kéier déi Opreegung: Ass et eppes? Kënnt et beim Publikum un? Geschitt net iergendeng Katastrof?
All Joer die selwechte Misère. Gëschter war ech die ganzen Dag opgereegt. Wéi mir no engem Dëppche Gebeess an enger Taass Kaffi och nach e Spighel aus der Hand gefall war, konnt ech et net méi leegnen: ech war zolitt nervös!
Mee alles ass gutt gaangen gëschter owend, alles huet gutt geklappt an de Leit huet et och gefall, esou denke mir emol no dienen éischte Kritiken: “Ofwieslungsräich, professionell, pickeg, kuerzweileg!”
Eng gelonge Première deemno. Da loosse mir elo mol kucken, ob mir déi nächst Woch nach kënnen die selwechte Programm spillen.
Haut - 17.10. - geet et lass: Première vum Programm 2013 “Héichwaasser” vum Kabaret Sténkdéier. Mir freeën eis, datt et endlech esou wäit ass, mee eis geet och zolitt de Wapp!
Lauschteren op RTL …
Mar geet et lass! D’Première vum neie Programm vum Kabaret Sténkdéier: 17.10.2013.
D’Generalprouwe si gelaf, erschreckend gutt(!!!), a bis elo ass och nach kee krank. - Den Owend RTL lauschteren! Géint 19.30 Auer en Interview am “Feierowend”.
Wéi all Joer war de Claude “Sibi” Sibenaler dobei an huet Fotoe gemaach.
