Roland-Meyer.lu

Ech war elo d’Susy Lentz, d’Maggy Molitor, d’Thea Engel an d’Monique Mille op Miersch kucken. De Programm huet mir “fit, sexy, jonk, propper, fundametal a musikalesch”-gutt gefall! D’Texter si vum Josiane Kartheiser, dem Maggy Molitor an dem Roland Gelhausen, d’Musik mécht d’Netty Glesener an de Conny Scheel féiert d’Regie.

Gitt onbedingt kucken! Et ass all Cent wäert! Mäin absolute Favorit: “Voll dobäi”.
Hei de Site vun de Makadammen.

Hei de Pressetext vun der neier Revue:
“E Bistro ( de luxe oder net ), dat ass wuel Kaartespill um Stammdësch a Musek aus der Juckbox, mä virun allem ass et d’Welt vun dir a vu mir, de Biotop vun dem einfache Mann vun der Strooss – an dëst Joer och vun de Revue-Auteuren Jay ( Jay Schiltz ), Jochri ( Josy Christen ), FrankY ( Frank Kuffer ), Marquis ( Marc Weidert ),  Romey ( Roland Meyer ) a Wagu ( Guy Wagner ).

E Bistrot ass eng eenzeg Sitcom…a weem sees d’et !, well um Stammdësch oder um Comptoir do begéint ee sech : no 10 Joer den Euro an de Frang, d’Asylanten an d’Marie-Josée Jacobs oder d’Staatsbeamte sëtzen zesumme beim Humpen – well hei ginn déi net bewert…

Um Stammdësch oder um Comptoir versicht de Juncker eist Geld ze retten, d’Ministere versichen hir gëllen Aueren ënnert d’Vollek ze bréngen an esouguer d’Scheichen aus den Emirate kafe ganz Lëtzebuerg op – mat oder ouni neiem Foussballs-Stadion.

Um Stammdësch oder um Comptoir gëtt den Tour de France gewonnen an nieft all deenen internationalen Deeg fanne mer och nach Plaz um Kalänner fir e Weltdag vun eisem Index, vu Bommen-Alibien no iwwer 25 Joer, vum Stater Tramm oder vun deem groussen Teppech, ënnert deem sech esou villes eremfënnt…

A wa mer dann deen Allerleschte viru Feierowend gezaapt kréien, hu mer endlech eng Medezin géint déi mënschlech Dommheet fonnt – och wann a Milliarde Joeren nach kee Kraut dergéint gewuess wor. Mä egal wéi, wetten, dass se am Joer 2030 um Stammdësch nach esou muenech aneres iwwert eis ze erziele wëssen, wat haut esouguer den Hoppen Téid emol nach guer net weess…”

Reservatiounen op www.luxembourgticket.lu oder 470895 - 1

An hei den Internetsite vum “Lëtzebuerger Theater”

RTL huet “Kompetenzsockelen” zum “Grujelwuert vum Joer” gemaach an doheem an an der Schoul si vill Leit domat geplot. Am “CK” hunn ech en Artikel publizéiert, an diem ech d’Kompetenze vun eise Kanner emol ganz anescht beliichten:

Hei kënnt dir dien Text liesen.

Esou wéi versprach gëtt et elo dien nächsten Text. “Ausser Otem” heescht en an ass aus der Editioun 2007 “Kulturus Interruptus”. Deemools war Lëtzebuerg Kulturhaaptstaadt a vu Kriiss ass nach net geschwat ginn! Et war och d’Joer an diem mäi Musical “Fusion” opgefouert gouf an eisen Andy 2. am Giro gouf.

Hei kënnt dir den Text liesen.

Hei gëtt et nach aner Texter.

Hei geet et bei d’Revue vum Lëtzebuerger Theater.

… fir Iech all, déi Dir heiansdo hei op mengem Blog laanschtkuckt.

Viru genee engem Joer hunn ech dien éischte Post gemaach an elo ass et un der Zäit fir de Bilan (sic!) ze maachen. Ech weess net, wivill Leit dës Säit besicht hunn, mee an dienen nächsten dräi Deg probéieren ech dat nach erauszefannen. Versprach!

2011 war am Prinzip e gutt Joer: de “Schwaarze Péiter”-Programm vum “Kabaret Sténkdéier” huet ronn 4000 Leit gelackelt, mat de “Winklepickers” hunn ech “Haddocks and French Kisses” opgeholl , dat elo zu Trierweiler bei Skywalk gemastert gëtt an e puer fulminant Concerte gespillt, d’Theaterschoul huet sech gutt entwéckelt, ech hat eng Rei flott Liesungen, “Méi ass et net” vum Remy Kraus, Tom Kraemer a vu mir ass erauskomm, “Dem Kinnék säi Bësch”, en Theaterstéck fir dat internationaalt Joer vum Bësch ass a ville Schoule gespillt ginn, mam “Holzwuerm” hu mir de “Kinnék ouni Kroun” virun 2300 Spectateure gespillt, de Ministère huet meng Broschüre iwwer d’Theaterschoul als Courrier-No spécial erausginn, “Muedebëtzeg” ass esou gutt wéi fäerdeg a kënnt geschwënn eraus…

Mir wënschen ech datt 2012 grad esou gutt gëtt an Iech nëmmen dat BESCHT!

Zanter 2006, also schonns während sechs Joer schreiwen ech Texter fir d’Revue vum “Lëtzebuerger Theater”. Ech hu mech elo decidéiert, déi Texter, déi mir am beschte gefalen, hei ze publizéieren. Wann Dir déi Texter wëllt spillen, kënnt Dir dat gäre maachen. Dir sollt just w.e.gl. mäin Numm als Auteur vum Text dann uginn.

Als éischen Text gëtt et hei den “30 Joer feste Prisong” aus dem Programm 2010 “Helleger Bimbam”. Et ass ee vu menge Lieblingstexter.

Hei kënnt Dir e liesen.

Hei gëtt et nach aner Texter, Kuerzgeschichten an Artikelen…

1987 hunn de Remy Kraus an ech ugefaangen, dien éischte Programm vum “Kabaret Sténkdéier” ze schreiwen. Mat enger klenger Paus zwësche 1990 an 1997 hu mir all Joer een neie Programm lancéiert, heiansdo och alt zwou Produktioune gemaach an donieft dräi Bicher erausbruecht.

Dëst Joer sinn esouvill Leit wéi nach ni kucke komm, an déi meescht waren zefridden a komme bestëmmt zréck… Mir si schonns e bëssen houfreg op dëse Succès, wëll wann een iwwer méi wéi 20 Joer kabarettistesch Programmer mécht, déi och e sozial-kriteschen Aspekt hunn, also net nëmmen iwwer d’Politiker an “déi do uewen” hierfalen, mee och alt d’”Leit wéi s du an ech” op d’Schëpp huelen, dann ass d’Gefor grouss, datt engem säi Publikum lues a lues méi kleng gëtt, wëll een ëmmer emol nees een trëppelt, ëmmer emol nees seet een eppes, wat engem Spectateur net passt, an die kënnt da net méi erem.

Dat ass normal an dat wäert eis och alt net besser ergoen, wéi all dienen aneren Ensembelen. An trotzdem hu mir nach ëmmer, no méi wéi zwanzeg Joer ënner diem selwechte Numm, ouni Imagewiessel, ouni groussen Tamtam an de Medien, en treie Publikum, die vu Joer zu Joer wiisst.

Dat mécht mir Freed!

Ech war schonns e bëssen erféiert, wéi ech gelies hunn, wat se zu Miersch alles iwwer mech zesummegesicht hunn. Mee net nëmmen iwwer mech, nee och nach iwwer “eng Millioun” aner Lëtzebuerger Auteuren. Respekt! Do ass gutt geschafft ginn an et ass wierklech interessant, eng Kéier am Lexikon vun de Lëtzebuerger Auteuren vum Mierscher Literaturzenter (Maison Servais) laanschtzekucken.

Autorelexikon Maison Servais Miersch

An hei den Artikel iwwer mech.

… de “Schwaarze Péiter”. Et war vill Aarbecht! Et war och e grousse Succès! Ronn 3900 Leit hunn de Programm 2011 gesinn. Et ware genee 70 Deg voller Spannung, Freed, Enttäuschung, Zweifel, Angscht, Zefriddenheet, Baangen, Gléck. De 19.9. hunn d’Prouwen ugefaangen an de 27.11. war déi lescht Virstellung. Ech hu mech an de Fanger geschnidden, war op der Tëlé an um Radio, hunn e Buch fäerdeg gemaach, hu mech agesat, alles ginn, hu mech bei all Virstellung selwer op den Aarm geholl… hu gezéckt a war kuerz drop nees zouversiichtlech. Elo muss ech mer nees all déi Selbstverständlechkeeten vun diene leschte Méint ofwinnen, ech muss mech vum Kabaret entwinnen. An dat ass och gutt esou.

D’Publikatioun vu mengem neie Buch “Muedebëtzeg” steet virun der Dir, de Release vun eisem Winklepickers-CD “Haddocks and French Kisses”, Texter schreiwen fir d’Revue 2012 vum Lëtzebuerger Theater, zwee Theaterstécker fir Kanner schreiwen, de “Sténkdéier”-Programm 2012 preparéieren an nach e ganze Koup aner Projeten, vun dienen ech elo an op dëser Plaz nach net schwätze kann.

Dem “Schwaarze Péiter” nach eng leschte Kéier nogekuckt, wéi e lues a lues méi kleng gëtt, sech dann iewer séier no vir gedréint a lass…

Mir plënneren: aus dem Keller vum Servais-Haus geet et an de grousse Sall vum Mierscher Kulturhaus. Nach e puer Plaze sinn ze kréien. Maacht Iech séier bäi wann Dir de Programm 2011 vum Kabaret Sténkdéier nach wëllt gesinn! Gëspillt gëtt e Mëttwoch, en Donneschdeg, e Freideg an e Samschdeg ëmmer um 20.00 Auer an e Sonndeg um 17.00 Auer.

Hei kënnt Dir Plaze reservéieren.