De Claude Sibi Sibenaler huet déi 13 éischt Stécker aus eisem 2013er Programm “Héichwaasser” elo online gesat. De Rescht kënnt nach no. Him en décke MERCI an hei kënnt Dir se kucken:
Zanter 2006 ass et fir mech scho bal eng Traditioun ginn: ech schreiwen een oder zwee Texter fir d’Revue. An och dëst Joer ass nees dien een oder aneren Text vu mir an der Revue 2014 ze gesinn. Den Titel fannen ech dëst Joer nawell extragutt geroden. Première ass den 8.4.2014.
Hei gitt Dir méi gewuer.
En Dënschdeg zu Walfer ware nees vill Leit do, schätzungsweis eng 80 Stéck, vläicht esouguer méi. Dat war déi leschte Kéier, datt ech dës Liesung gemaach hunn. An och hei gouf ech nees gefrot, ob et den Text vum “Zickelalarm” net als Buch ze kafe gëtt. Gëtt et net!
Wéi ech mat dëser Liesung ugefaangen hunn, hätt ech mir ni dreeme gelooss, datt dat esou ee groussen Erfolleg géif. Ech hat also och net eng Sekonn doriwwer nogeduecht de Manuskript ze publizéieren.
Mee nodeem esou eng grouss Nofro besteet, hunn ech mir virgeholl, éischtens an engem bis zwee Joer en neien “Zickelalarm” ze maachen an dann zweetens dien éischten an dien zweeten zesummen erauszeginn. Do brauche mir iewer nach e bësse Gedold.
Am “Zickelalarm I” waren Extraiten aus folgende Bicher: “Den décken dommen Dudu” an “Dem Kinnek säi Gaart”… fir all déi, déi wëlle noliesen. 
An op Youtube sinn elo grouss Deeler vum “Zickelalarm I” ze gesinn:
“Hallo, Rol!
Am Cité, dat war nawell ganz flott, nee, saugudd!! Wat hues du eng Energie! Och deng “politesch” Aussoen (Kids, onméiglech Immobilienpreisser, den Zwang zu 2 schaffen mussen ze goen, den Réunitis-, Charta- an Formatiouns-Wahn, …) waren kloer, engagéiert, pertinent, couragéiert - Respekt!
Du soss, du giffs all Kand reich Elteren verschafen. Dat, méngen ech, ass effektiv dat eenzegt Mettel, fir all di Gewalt, all di aktuell himmelschreiend Ongerechtegkeeten an den Greff ze kréien.
Dozou just nach e Sproch, anscheinend vum Charlie Chaplin: WER NICHT GELIEBT WIRD, HASST! All di Leit, di komplett lenks leien gelooss gin, um oder ennert dem Existenzminimum mussen liewen, all di Kanner - di mussen jo iwwerzeegt sin, si giffen net “geliebt” gin. Wat kënnt do nach op eis duer???
Merci, Rol - dat war saugudd! Pir
P.S.: Vleit, vleit, kommen ech och nach op Walfer - no guarantee! “
Haut um 3.Dezember ass déi zweetlescht Liesung aus der Zickelalarm-Staffel 2013. Déi allerlescht ass de 17.12. zu Walfer.
Fir 2014 ass iewer eng Suite virgesinn, ze soe gëtt et jo nach ëmmer genuch!
En Dënschdeg, de 17.12., sinn ech mat menger kabarettistescher Liesung zu Walfer am Centre Prince Henri. Et geet um 20.00 Auer lass an den Entrée ass fräi.
Op Invitatioun vun der a.i.p., der Association des institutrices et instituteurs préscolaires, sinn ech do. Sollt Dir bis elo den “Zickelalarm” also nach net gesinn hunn, dann ass hei eng Geleeënheet.
Dës Woch plënnere mir! No 18 Virstellungen am CNL gëtt mar d’Bühn am Kulturhaus opgeriicht. Mir freeën eis schonns op déi 5 ausverkaaften Optrëtter am grousse Sall mat all Kéier iwwer 400 Leit.
Leider kënne mir aus organisatoresche Grënn net verlängeren, esou datt vill Leit den 2013ter Programm net kënne gesinn. Mir verspriechen iewer fir déi nächst Saison nach méi Virstellungen ze programméieren.
Wéinst diem groussen Undrang ass d’Liesung elo vum 5. Stack erof op den 2. Stack an de groussen Auditorium geluecht ginn. Nach ass Zäit, fir sech unzemellen…
Mir haten emol eng Kéier e Programm, dien huet “Totalen Ausverkaf” geheescht. Dat war 2003. Och deemools hu mir 23mol gespillt, deemools konnte mir och nach Verlängerunge maachen. Haut ass dat aus organisatoresche Grënn net méiglech. Elo spille mir och 23mol, allerdings 5mol am Mierscher Kulturhaus. An nees ass alles ausgebucht. Super, dat freet eis immens.
Fir dat nächst Joer heescht dat, datt mir musse méi dacks spillen. Am léifsten am CNL, vläicht och am Kulturhaus. Emol kucken; et ass jo nach laang…
www.stenkdeier.lu : hei gëtt et all d’Informatiounen iwwer d’Sténkdéieren.
Hei ass déi lescht Chance fir dem “Kabaret Sténkdéier” säi Programm “Héichwaasser” iewer nach ze gesinn:
Sonndes, den 1. Dezember um 17.00 Auer gëtt et nach e puer Plazen. Dono ass et zou! Mir kënnen och net verlängeren, well dat aus organisatoresche Grënn net méiglech ass. Maacht Iech also séier bäi; dien éischten ass vir!
