Um Veiner Bicherfest den 21.9. um 15.00 Auer am Schlooss: eng Liesung fir d’Kanner: fir d’éischt : “Zu lëtzebuerg ginn et keng Piratekapitänen” an dann um 15.30 Auer fir déi e bësse méi grouss: “Den décken dommen Dudu”. Net verpassen!
Hei gëtt et Informatiounen iwwer de Programm vum Bicherfest.
Zesumme mat “Just Friends” an engem gudden Iessen vum Jeanne Offermann: eng Roughmix-Liesung de 26.9. zu Born an der Brennerei… an dat um 19.30 Auer.
Informatiounen zu der Liesung an zum Iessen - Umeldung
Eng Rei Liesunge si fir den Hierscht programméiert.
Hei emol déi éischt:
21.9.: Um Bicherfest zu Veinen: Piratekapitänen a vollfett Kanner - eng Liesung fir Kanner mëttes um 15.00 Auer
25.9.: “Roughmix”-Liesung zu Ettelbréck an der Bibliothéik mat “Just Friends”
26.9.: “Roughmix”-Liesung zu Born an der Brennerei mat “Just Friends” a guddem Iessen
Vläicht gesi mir eis eng Kéier am Hierscht …
An der Literaturbäilag vum Tageblatt war dëser Deeg eng Rezensioun vu “Roughmix”. Dat freet mech, ech hunn et ëmmer gär, wann iwwer d’Buch geschwat gëtt. - Zu Lëtzebuerg gëtt vill ze wéineg iwwer Bicher geschwat! - De Jeff Thoss huet dat tipptopp gemaach, eng Parti Detailer ervirgehuewen, déi weisen, datt hien den Text net nëmmen iwwerflächlech gelies huet, mee sech richteg drop agelooss huet. An hie beschreift och ganz gutt déi Gefiller, déi ee beim Liesen huet.
A sengem leschte Saz seet en: “Roughmix ist ein hochaktueller, vielleicht gar ein wichtiger Roman, aber oft auch ein ärgerlicher, dem ein finaler Feinschliff wohl nicht geschadet hätte.”
Ech hu mer gesot, wann ee säi Buch “Roughmix” nënnt, an och stilistesch esou drun erugeet, da muss een och de Courage hunn, fir grad op esou ee “Feintuning” ze verzichten. Nëmmen da bleift een authentesch a kongruent. Datt dat “ärgerlich” ass, ass gewosst an esou och geplangt… an datt ech d’Leit verstéieren an opbréngen, domat muss ech liewen.
Ech wëll de Lieser mat dësem Buch rose maachen, an ech wëll, datt en dat och kierperlech spiert. A mäi Wee fir dat ze realiséieren war de “Roughmix” als solchen stoen ze loossen.
Hei weider Informatiounen iwwer “Roughmix”, ee Buch bei diem sech engem emol kann de Mo ëmdréinen 
Et geet also nees an d’Rennen! Esouvill literaresch Bicher wéi nach ni sinn op der Longlist a Roughmix ass dobei!
“Roughmix”… déi perfekt Lektür fir am Summer op d’Reess ze goen!
Hei e klengen Auszug aus der Liesung de 4.6. zu Miersch am Kulturhaus:
http://www.luxorr.lu/lord-tv.html
“Fust Friends” sinn: Luc Hoffmann, Mulles Scholtes a Jang Steffen.
Am Hierscht gëtt et nach weider Liesungen, ënnert anerem zu Uewerkur an an der Staadt…
Et ware ganz vill Leit gëschter op der Presentatioun vu “Roughmix”, domat hat kee wierklech gerechent. De Mix aus Liesen a Musik huet geklappt, war vläicht e besse laang, mee fir déi “éischte Kéier” hëllt een sech ëmmer zevill vir. D’Kritike ware super, mee mir brauche jo och net vill . Mir schaffe weider um Mix fir den Hierscht, wa mer mat der Show op Tournée ginn.
E ganz décke MERCI dem Lieshaus, dem Kulturhaus, dem Verlag Op der Lay an domat mengen ech all déi Leit, déi sech gëschter beméit hunn.
D’Fläschepost ass elo also ënnerwee, wien se alles opmécht a wat draus gëtt, wees ech net.
An Zesummenaarbecht mat Op der Lay an dem Mierscher Lieshaus ass den Owend um 20.00 Auer zu Miersch am Foyer vum Kulturhaus déi offiziell Presentatioun vu “Roughmix”.
D’Lëtzebuerger Sportswelt huet sech géint mech zesummegedoen an esou hunn ech den Owend als Konkurenz de Lännermätsch géint Italien an de Prolog vum Tour de Luxembourg.
Mee mir wëssen ze kämpfen: ënnerstëtzt ginn ech vun “Just Friends”, dem Mulles Scholtes, dem Luc Hoffmann an dem Jang Steffen. Den Entrée ass fräi a Reservatioune gëtt et keng; well déi wierklech gutt Saachen am Liewe kann een net am Viraus reservéieren.
Bis den Owend, ech freeë mech an ziddere mech duerch den Dag!
De Gilles Wünsch vum Radio 100,7 presentéiert haut um 17.20 Auer a mar um 8.35 Auer mäin neit Buch “Roughmix” a virun allem d’Liesung e Mëttwoch um 20.00 Auer am Mierscher Kulturhaus an Zesemmenaarbecht mat Op der Lay an dem Mierscher Lieshaus.
An Zesummenaarbecht mat dem Mierscher Lieshaus an dem Verlag Op der Lay stellen ech
e Mëttwoch, de 4. Juni 2014 um 20.00 Auer
zu Miersch am Foyer vum Kulturhaus
mäin neit Buch vir.
Musikalesch ënnerstëtzt ginn ech vun “Just Friends”, dat sinn: de Mulles Scholtes op der Gitar, de Luc Hoffmann um Gesang an op der Gitar an de Jang Steffen um Bass an op der Percussioun.
Den Entrée ass fräi!
