Roland-Meyer.lu

Gespaant si mir nees all! No engem halwe Joer Schreiwen a wochelaangem Prouwen kann ech am Moment guer näischt soen. Ech hunn hunn zwar e gutt Gefill, mee wéi et de Leit gefällt weess ech net. De Fanger ass nach ëmmer net ganz an der Rei, dofir ass d’Musik dës Kéier anescht wéi déi lescht Joeren. Ob dat elo manner gutt ukënnt musse mir nach ofwaarden. Ech si frou, datt et elo lass geet an de Stress vun diene leschten Deg a Wochen noléist.

Frou sinn ech och, datt d’Buch fäerdeg ginn ass. Fir just 12 € kënnt dir “Méi ass et net” an der Oweskeess zu Miersch kafen, a gläich och hei um Site.

Nach eng Woch bis d’Première! De Programm steet, wann d’Politik eis net nach weider op Trapp hält, déi nei Anthologie mat Texter (Méi ass et net; 2006 bis 2010) aus eise rezente Programmer ass do, de Keller am Literaturhaus fëllt sech. Elo komme nach d’Generalprouwen, da kann et lass goen. A jo, dem Fanger geet et besser, mee en ass nach net geheelt… ech hoffe weider!

Gëschter si se komm, déi gutt Noriichten fir “Muedebëtzeg”! “Op der Lay” huet gring Luucht ginn fir d’Produktioun vum neie Buch fir Erwuessener. Elo ass et just nach eng Fro vun der Zäit, bis de Manuskript de Wee an d’Bicherbuttiker fënd. Zanter 2008 geeschtert mir dien Text elo am Kapp rondrëm, an ech si frou, wann e gedréckt ass, da verschwënd en do eraus.Vläicht!

No “Modern Welt” a “Gutt ze wëssen” ass “Méi ass et net” elo dat drëtt Buch vun den Auteuren vum “Kabaret Sténkdéier”: Tom Kraemer, Remy Kraus a mir. Iwwer d’Summerpaus waren d’Präparatiounen e bëssen duerchernee gelaf, mee elo si mir nees an dier richteger Spuer! Fir d’Première vu “Schwaarze Péiter” den 13. Oktober zu Miersch am Literaturzenter ass d’Buch do. Dës Kéier gëtt et d’Highlights aus de Programmen vun 2006 bis 2010. Déi zwee éischt Bicher sinn ëmmer nach disponibel a kënnen hei am Bicherbuttik op dëser Säit bestallt ginn: an de Shop.
www.stenkdeier.lu

Esou séier geet et an ech hat et elo bal vergiess: de nei “Cliärrwer Kanton” ass do. Vu mir ass en Artikel iwwer d’”Theaterschoul” drann. Dës Zeitung kënnt véiermol am Joer eraus a bréngt eng Hellewull Informatiounen a Menungen iwwert an aus dem Norde vum Land. Zanter 1979 kënnt se elo schonns eraus a wann Dir se gär gingt abonnéieren oder wann Dir Iech dofir interesséiert, da klickt hei:

http://www.dck.lu/revue/abonnement

Et ass elo Vakanzenzäit. Dat ass gutt. Wëll do hunn ech endlech nees genuch Zäit fir de Skript vu mengem neie Buch “Muedebëtzeg” ze iwwerschaffen, an, hoffentlech geschwënn, ofzeschléissen. Iwwer zwee Joer hunn ech un diem Buch fir Erwuessener geschafft, an elo denken ech, datt et fir Chrëschdeg kënnt fäerdeg ginn. Mee ech paken Holz un, zanter ech un der “Theaterschoul” schaffen, hunn ech net ëmmer déi néideg Zäit, déi néideg Motivatioun, die néidegen Iwwerbléck…
An dësem Moment sief just esouvill verroden: et geet am neie Buch em Verfall, Krankheet, Doud. Net onbedingt flott Themen. Mee dës Kéier huet et misse sinn. Fir mech war dësen Text ganz wichteg an huet missen eraus.

Eng ganz Broschür iwwer de Kannertheater an de Lëtzebuerger Grondschoulen hunn ech an diene leschten zwee bis dräi Joer geschriwwen an déi ass elo als N° spéciale beim Ministère de l’Éducation nationale erauskomm. Wann Dir se net automatesch kritt hutt, iewer drunn interesséiert sidd, kënnt Dir Iech bei mir mellen, ech schécken Iech se gären.

Die neie “Clärrwer Kanton” ass elo just eraus mat elo schonns mengem 9. Artikel aus der Rei : Ein Ort, ein Buch, ein Restaurant. D’Buch ass dës Kéier “Drei Dollar” vum Australier Elliot Perlman, den Ort ass d’Naturschutzgebitt “Conzefenn” bei Elwen am Norde vum Land an de Restaurant ass d’”Ecuelle” zu Wilwerdang. Wann Dir also eng Kéier an de Norde vum Land fuert a wëlles hutt iessen ze goen, da kënnt Dir iech hei informéieren.

Virun zwee Joer hunn ech mat 6 Schülerinnen aus der “Ecole privée St. Anne” vun Ettelbréck e Buch geschriwwen. Den Erléis vum Verkaf ass fir d’Alupse gewiescht an dëser Deg hunn d’Meedercher de Scheck iwwerreecht. Et war e flotte Projet, an d’Buch, dat mir zesumme geschriwwen hunn, ass och ganz flott. Dir kënnt Iech un d’Schoul wenden, wann Dir d’Buch gären hätt.

Hei nach Informatiounen aus dem “Wort”.

Et gëtt der also nees: d’Piratekapitäne si nees do an de Barry Lee ass nees iwwerall ze kréien. Dat ass gutt! Fir all déi, déi dëst wonnerbaart Buch fir Kanner nach net gelies hunn, ass et nees méiglech et an de Bicherbuttéker ze kafen. Also net laang gezéckt! Natierlech kënnt Dir et och direkt hei am Bicherbutték op dëser Säit bestellen.