Roland-Meyer.lu

“Muedebëtzeg” heescht dat neit Buch fir Erwuessener. Ech hunn et an diene leschten dräi Joer geschriwwen, an et spighelt eng Zäit, déi net ganz einfach war.

2010 ass bei Omega 90 d’Buch “Am anderen Ende der Lichtung” erauskomm. An diem Buch ass den Text “Plat du jour”, dien als eng Zort Viraarbecht fir “Muedebëtzeg” kann ugesi ginn. Vill Motiver, déi och am Buch erëmkommen, fënd ee schonns an dësem Text. Et war deemools ee vun dienen éischte Versich, mengen Iddien méi no ze kommen.

Esou fänkt den Text un: “14.21 Auer. Et gëtt esou lues eidel heibannen. Elo gi se nees all op hier Aarbecht. Elo gi se nees op hier Büroen. Elo gi se nees op hier Banken. Eng Arméi schwaarzgekleed Männer a Fraen, all em déi 30 Joer al, déi meeschtens franséisch schwätzen, meeschtens e bëssen ze haart, déi de Plat du jour gutt fannen, déi de Kader, den Ambiente gutt fannen an déi esou guer de Bordeaux, dien se fir 31 Euro drénken, gutt fannen. Et gesäit een hinnen of, datt se dat alles gutt fannen, se verstoppen et net, nee se loossen et all Mënsch gesinn, dien hei am Restaurant, 100 Meter iwwer dem Musée, d’Strooss erop, sëtzt. Jidderee soll et miirke, jidderee soll et gesinn. Hier gutt Laun soll ustiechen. Mee se schreckt just of, wëll se hu keng Ahnung, se wësse jo näischt, se kënnen et net wëssen. Wouhir sollen se et och wëssen? Si hunn dat net op hierer Universitéit geléiert. Do léiert een dat net. Op der Uni léiert ee Saachen fir d’Zukunft, fir déi Zäit no der Schoul, fir déi Zäit dono, wou ee schaffe geet, Sue verdingt, matmécht, eng Bank, eng Entreprise opbaut, sech eppes opbaut, sech eng Famill opbaut, sech en Haus opbaut, sech e Verméigen opbaut. An elo, an der Finanzkriiss? …”

Wann Dir wëllt, kënnt Dir hei die ganzen Text liesen, dien am Buch “Am anderen Ende der Lichtung” erschingen ass.

Léif Frënn vum Kabaret Sténkkdéier,
de Kabaret Sténkdéier paust déi nächst Woch.
Dono sinn nach den 9., 10., 11., 12., 16., 17., 18. an 19. November Virstellungen an der Maison Servais zu Miersch, all Kéier um 20.00 Auer.
Da plënnere mir an d’Kulturhaus: den 23., 24., 25. a 26. November spille mir ëmmer um 20.00 Auer an de 27. November schonns um 17.00 Auer.
“Méi ass et net” ass dat neit, elo schonns drëtt Buch mat diene beschten Texter aus de Programmer vun 2006 bis 2010. An der Oweskeess an op eisem Internetsite kënnt dir et kréien.
Bei Youtube fand Dir en “amuse bouche” vum aktuelle Programm.

“Modern Welt” war dat éischt an ass am Hierscht 2001 erauskomm. Mir hunn do all d’Texter zanter 1988 - esou laang gëtt et de Kabaret Sténkdéier schonns (!!!)- zesummegefaasst, bis 2000. An diem Buch sinn nach net esou vill Texter, déi mir, de Remy an ech, zesumme mam Tom geschriwwen hunn, wëll hien eréischt 1999 bei de Grupp gestouss ass. An dësem Buch fand Dir ënnert anerem eis Klassiker “Cours de recyclage”, d’”Fouerlidd” an dat phänomenaalt “Um Camping”, dat de Berti dono ni méi wollt spillen:-).

“Gutt ze wëssen” ass  2006 erauskomm. Hei gëtt et eng Auswiel mat Texter vun 2001 bis 2006. Als Klassiker vum Kabaret Sténkdéier fand Dir hei “Äschermëttwoch”, “Ein Schiff wird kommen”, an de “Requiem fir de Lëtzebuerger Béier”. Eist “Béierlidd” spille mir am aktuelle Programm zesumme mam “Fouerlidd” als Zugab.

An elo, 2011, ass et dann u “Méi ass et net”. Mir hunn an dësem Buch déi Texter zesummegestallt, déi eis an diene leschte 5 Joer, also vun 2006 bis 2010 am beschte gefall hunn, an déi och bei de Leit am beschten ukoumen. Och heirënner gëtt et schonns Klassiker: “Metz-Lëtzebuerg”, d’”Clientskaart”, d’”Navettelidd”, de “Stacklëtzebuerger”, an, an, an, …

Also eng gutt Geleeënheet fir all déi Erënnerungen nees obliewen ze loossen… - Hunn ech dat dann elo net schéi gesot!

Gespaant si mir nees all! No engem halwe Joer Schreiwen a wochelaangem Prouwen kann ech am Moment guer näischt soen. Ech hunn hunn zwar e gutt Gefill, mee wéi et de Leit gefällt weess ech net. De Fanger ass nach ëmmer net ganz an der Rei, dofir ass d’Musik dës Kéier anescht wéi déi lescht Joeren. Ob dat elo manner gutt ukënnt musse mir nach ofwaarden. Ech si frou, datt et elo lass geet an de Stress vun diene leschten Deg a Wochen noléist.

Frou sinn ech och, datt d’Buch fäerdeg ginn ass. Fir just 12 € kënnt dir “Méi ass et net” an der Oweskeess zu Miersch kafen, a gläich och hei um Site.

Nach eng Woch bis d’Première! De Programm steet, wann d’Politik eis net nach weider op Trapp hält, déi nei Anthologie mat Texter (Méi ass et net; 2006 bis 2010) aus eise rezente Programmer ass do, de Keller am Literaturhaus fëllt sech. Elo komme nach d’Generalprouwen, da kann et lass goen. A jo, dem Fanger geet et besser, mee en ass nach net geheelt… ech hoffe weider!

Gëschter si se komm, déi gutt Noriichten fir “Muedebëtzeg”! “Op der Lay” huet gring Luucht ginn fir d’Produktioun vum neie Buch fir Erwuessener. Elo ass et just nach eng Fro vun der Zäit, bis de Manuskript de Wee an d’Bicherbuttiker fënd. Zanter 2008 geeschtert mir dien Text elo am Kapp rondrëm, an ech si frou, wann e gedréckt ass, da verschwënd en do eraus.Vläicht!

No “Modern Welt” a “Gutt ze wëssen” ass “Méi ass et net” elo dat drëtt Buch vun den Auteuren vum “Kabaret Sténkdéier”: Tom Kraemer, Remy Kraus a mir. Iwwer d’Summerpaus waren d’Präparatiounen e bëssen duerchernee gelaf, mee elo si mir nees an dier richteger Spuer! Fir d’Première vu “Schwaarze Péiter” den 13. Oktober zu Miersch am Literaturzenter ass d’Buch do. Dës Kéier gëtt et d’Highlights aus de Programmen vun 2006 bis 2010. Déi zwee éischt Bicher sinn ëmmer nach disponibel a kënnen hei am Bicherbuttik op dëser Säit bestallt ginn: an de Shop.
www.stenkdeier.lu

Esou séier geet et an ech hat et elo bal vergiess: de nei “Cliärrwer Kanton” ass do. Vu mir ass en Artikel iwwer d’”Theaterschoul” drann. Dës Zeitung kënnt véiermol am Joer eraus a bréngt eng Hellewull Informatiounen a Menungen iwwert an aus dem Norde vum Land. Zanter 1979 kënnt se elo schonns eraus a wann Dir se gär gingt abonnéieren oder wann Dir Iech dofir interesséiert, da klickt hei:

http://www.dck.lu/revue/abonnement

Et ass elo Vakanzenzäit. Dat ass gutt. Wëll do hunn ech endlech nees genuch Zäit fir de Skript vu mengem neie Buch “Muedebëtzeg” ze iwwerschaffen, an, hoffentlech geschwënn, ofzeschléissen. Iwwer zwee Joer hunn ech un diem Buch fir Erwuessener geschafft, an elo denken ech, datt et fir Chrëschdeg kënnt fäerdeg ginn. Mee ech paken Holz un, zanter ech un der “Theaterschoul” schaffen, hunn ech net ëmmer déi néideg Zäit, déi néideg Motivatioun, die néidegen Iwwerbléck…
An dësem Moment sief just esouvill verroden: et geet am neie Buch em Verfall, Krankheet, Doud. Net onbedingt flott Themen. Mee dës Kéier huet et misse sinn. Fir mech war dësen Text ganz wichteg an huet missen eraus.

Eng ganz Broschür iwwer de Kannertheater an de Lëtzebuerger Grondschoulen hunn ech an diene leschten zwee bis dräi Joer geschriwwen an déi ass elo als N° spéciale beim Ministère de l’Éducation nationale erauskomm. Wann Dir se net automatesch kritt hutt, iewer drunn interesséiert sidd, kënnt Dir Iech bei mir mellen, ech schécken Iech se gären.