De Gollo seet a 14 Deeg kann d’Buch do sinn. Alles ass verbessert, de Cover esouwäit fäerdeg. Wann dir d’Buch scho wëllt virbestellen, kënnt dir dat elo hei maachen. Esoubal et do ass, kritt dir et da mat der Post heemgeschéckt.
Zesumme mam Claude Sibi Sibenaler maache mir den Owend de Video fir die neien CD. Ausgewielt hu mir “Handjive”.
An diene nächsten Deeg kënnt dir de Film hei gesinn.
Esou ass de Slogan, die mir gesicht hunn fir déi zwou Release-Partyen. An Zesummenaarbecht mam “Bluesclub Lëtzebuerg” an zesumme mat “Crossroads”, déi hiere neien CD “Second chance” virstellen, presentéiere mir “Haddocks and French Kisses”.
Éischten Owend: freides, den 10.2.: Sang a Klang am Gronn - Opening 20.30 Auer
Zweeten Owend: samschdes, den 11.2.: Ancien Cinéma zu Veinen - Opening 21.00 Auer
Déi zwee Owenter ass den Entrée fräi!
… fir Iech all, déi Dir heiansdo hei op mengem Blog laanschtkuckt.
Viru genee engem Joer hunn ech dien éischte Post gemaach an elo ass et un der Zäit fir de Bilan (sic!) ze maachen. Ech weess net, wivill Leit dës Säit besicht hunn, mee an dienen nächsten dräi Deg probéieren ech dat nach erauszefannen. Versprach!
2011 war am Prinzip e gutt Joer: de “Schwaarze Péiter”-Programm vum “Kabaret Sténkdéier” huet ronn 4000 Leit gelackelt, mat de “Winklepickers” hunn ech “Haddocks and French Kisses” opgeholl , dat elo zu Trierweiler bei Skywalk gemastert gëtt an e puer fulminant Concerte gespillt, d’Theaterschoul huet sech gutt entwéckelt, ech hat eng Rei flott Liesungen, “Méi ass et net” vum Remy Kraus, Tom Kraemer a vu mir ass erauskomm, “Dem Kinnék säi Bësch”, en Theaterstéck fir dat internationaalt Joer vum Bësch ass a ville Schoule gespillt ginn, mam “Holzwuerm” hu mir de “Kinnék ouni Kroun” virun 2300 Spectateure gespillt, de Ministère huet meng Broschüre iwwer d’Theaterschoul als Courrier-No spécial erausginn, “Muedebëtzeg” ass esou gutt wéi fäerdeg a kënnt geschwënn eraus…
Mir wënschen ech datt 2012 grad esou gutt gëtt an Iech nëmmen dat BESCHT!
Gëschter ass de Saz vum “Muedebëtzeg” vum Gollo komm. Elo muss nach eng Kéier die ganzen Text gelies ginn an da gëtt e geschwënn gedréckt. Den Datum vun der Publikatioun réckelt also ëmmer méi no.
Déi grouss Theme vum Buch sinn de Verfall, d’Krankheet an den Dout. Kléngt zimlech depriméierent, ass et och.
Allerdéngs ginn och Saachen opgedeckt, déi Dir esou net fir méiglech gehal hätt! Eng dovun sinn d’Verbriechen déi am “Kale Krich” begaange gi sinn an dat guer net wäit eweg vun hei…
Zanter 2006, also schonns während sechs Joer schreiwen ech Texter fir d’Revue vum “Lëtzebuerger Theater”. Ech hu mech elo decidéiert, déi Texter, déi mir am beschte gefalen, hei ze publizéieren. Wann Dir déi Texter wëllt spillen, kënnt Dir dat gäre maachen. Dir sollt just w.e.gl. mäin Numm als Auteur vum Text dann uginn.
Als éischen Text gëtt et hei den “30 Joer feste Prisong” aus dem Programm 2010 “Helleger Bimbam”. Et ass ee vu menge Lieblingstexter.
Hei gëtt et nach aner Texter, Kuerzgeschichten an Artikelen…
Elo ëm d’Feierdeg hat ech e bessen Zäit, fir e puer vu mengen alen Texter eremzesichen an ze liesen. Dobäi sinn ech op een Text vun 1985 gestouss. Deemools, als jonke Kärel, sinn ech en Teppech kafe gaangen, wat sech iewer als zimlech komplizéiert Saach erausgestallt hat…
Et war ee vu mengen éischten Texter, déi ech an dëser schonns zolitt satirescher Form geschriwwen hunn, et goufe nach Frangen an nach keng orthografesch Regelen. Vill wäerten der soen, et war iwwerhaapt eng besser Zäit.
Ëmmer nees kréien ech Frëndschaftsufroen op meng Email-Adress an och Facebook selwer schéckt mir allerhand Mailen. Ech weess net wéi dat gaangen ass, mee do muss iergendeen e gewëssen “Rol Meyer” op Facebook ënner menger Email-Adress ugemellt hunn…
Esou kann et goen. Op alle Fall gëtt et och weider alles Interessantes iwwer meng Projeten just op dëser an op mengen aneren Säiten ze liesen an net op Facebook. Dat ass eppes wat ech ni wollt matmaachen, deels aus Angscht deels aus Iwwerzeegung. Wann ech gesinn, wat aus dier Iddi ginn ass a wivill Zäit vill Leit domat verléieren, dann denken ech, datt ech mech deemools richteg entscheed hat.
Internetsäiten mat Informatiounen iwwer meng Aarbécht (net iwwer mech!) fand Dir hei.
“De Cliärrwer Kanton” 3/2011 ass elo just eraus. Dir fand do nieft ville flotten aneren Artikelen och mäi Bäitrag “Kompetent “Kids”". Leider ass um Schluss vum Artikel iergend eppes falsch gaangen, esou datt nach e franséische Saz ze liesen ass, dien iewer näischt mam Inhalt ze dinn huet. Den Artikel hält mat “Dat wir schéin!” op. Ech muss nach klären, wéi dat konnt geschéien.
Fir all déi, déi de “Cliärrwer Kanton” net hunn, hei kënnt Dir den Artikel am Original liesen an d’Zeitung och abonnéieren.
Mir mussen eis nach e bësse gedëllegen. Vun “Op der Lay” hat et geheescht no de Walfer Bicherdeg ging direkt dat neit Buch fir Erwuessener gedréckt ginn. Mee leider huet alles méi laang gedauert wéi ueholl an esou wäert et dann nach weider daueren. Gedold, Gedold… mee dat ass net ëmmer meng Stäerkt!
